วันจันทร์ที่ 2 กันยายน พ.ศ. 2556

សម សារី

នៅពេល​សាធារណមតិ​ជាតិ​និង​អន្តរជាតិ​ចាប់ផ្តើម​សិក្សា​ពី​លក្ខ​ណស​ម្ប​តិ្ត​របស់លោក សម រង្ស៊ី ដែលជា​មេដឹកនាំ​ចលនា​ប្រជាធិបតេយ្យ​និង​អ្នកស្នេហាជាតិ​ដ៏​សំខាន់​នៅក្នុង​ប្រទេស​កម្ពុជា​ដែល​កំពុង​ត្រួសត្រាយ ផ្លូវ​ប្រជាធិបតេយ្យ​ជូន​រាស្ត្រ​ខ្មែរ​ទូទៅ ឲ្យ​ចេះ​ប្រើប្រាស់​សិទ្ធិអំណាច និង សម្រេច​ជោគវាសនា​របស់ខ្លួន ឲ្យ​បាន​ត្រឹមត្រូវ​នោះ គេ​តែងតែ​ពិនិត្យមើល​ពី​សែស្រឡាយ​និង​ប្រវត្តិ​គ្រួសារ​របស់លោក សម រង្ស៊ី ដែលជា​តំណក់ឈាម​ខ្មែរ​ស្នេហា​ជាតិ​ដ៏​មានតម្លៃ​ធ្លាប់ បានធ្វើ​ពលិកម្ម​គ្រប់បែបយ៉ាង ក្នុងការ​បម្រើ​ជាតិ​មាតុភូមិ ហើយ​ភាពស្មោះត្រង់​ចំពោះ​ព្រះរាជ​បល្ល័ង្ក និង​ព្រះមហាក្សត្រ​បាន​បន្ត​កើតមាន​តាំងពី​ជំនាន់​ជីតា​របស់លោក​ប្រធាន សម រង្ស៊ី មក​ម្លេ​៉ះ​។ វា​មិនមែនជា​រឿង​ចៃដន្យ​នោះទេ ដែល​លោក​ប្រធាន សម រង្ស៊ី
នៅតែ​បន្តធ្វើ​ការងារ​បម្រើ​ជាតិ​មាតុភូមិ ស្របតាម​ព្រះរាជតម្រិះ​របស់ សម្តេចព្រះ​នរោត្តម សីហនុ ដែល​ធ្លាប់​កសាង​សង្គមរាស្ត្រនិយម​ដ៏​ល្បីល្បាញ​ដែល​ភាសា​សាមញ្ញ​គេ​ហៅថា ជាការ​ដង្ហែ​តាម​សម្តេចព្រះ​នរោត្តម សីហនុ ត​ពី​ឪពុក​រហូតដល់​កូន ដូច្នេះហើយ​គេ​នៅតែ​មើលឃើញថា លោក​ប្រធាន សម រង្ស៊ី មាន​សារៈ​សំខាន់បំផុត ក្នុង​ការផ្តល់​ក្តីសង្ឃឹម​និង​ការផ្លាស់ប្តូរ​ជីវភាព​ថ្មី​សម្រាប់​រាស្ត្រ​ខ្មែរ​ទូទៅ ដែល​ប្រាថ្នា​ចង់​រស់​ក្រោម​ការដឹកនាំ​ដ៏​ត្រឹមត្រូវ ដូច​កាលពី​សម័យ​សង្គម​រាស្ត្រនិយម​។​
​          លោក​ប្រធាន សម រង្ស៊ី បាន​សម្តែង​ការពេញចិត្ត​ពេញ​ថ្លើម​បំផុត​ចំពោះ​ព្រះរាជ​សំណេរ និង​ហត្ថលេខា របស់​សម្តេចព្រះ​នរោត្តម សីហនុ ដែល​បាន​ផ្តល់នូវ​សុភ​វិនិច្ឆ័យ ចំពោះ​ក្រុមគ្រួសារ​របស់លោក ជាក់ស្តែង​កាលពី​ថ្ងៃទី​២៨ មេសា ឆ្នាំ​២០០៣ សម្តេចព្រះ​នរោត្តម សីហនុ បានផ្តល់​កិត្តិយស​និង​យុត្តិធម៌​ជូន​វិ​ញ្ញា ណ​ក្ខ​ន្ធ​លោកឪពុក​របស់លោក​ប្រ ធាន សម រង្ស៊ី ដោយ​ព្រះអង្គ​បាន​ឡាយព្រះហស្ថលេខា​ថា ”​ឯកឧត្តម សម សារី គឺជា​អ្នកស្នេហាជាតិ​ដ៏​ធំធេង​និង​ដ៏​បរិសុទ្ធ​ម្នាក់ ដែលជា​និច្ចកាល​បាន​បម្រើ​ជាតិ​យ៉ាង​វិសេស​វិ សាល​ក្នុងអំឡុង​ឆ្នាំ​ទាំងឡាយ នៃ​រជ្ជ កាល​ទី​១​របស់ខ្ញុំ និង​ពី​ដើមដំបូង​នៃ​សង្គមរាស្ត្រនិយម​”​។ សេចក្តីបញ្ជាក់ របស់​សម្តេចព្រះ​នរោត្តម សីហនុ គឺជា​ការ​ជូត​ជម្រះ​នូវ​មន្ទិលសង្ស័យ និង​ការទម្លាក់​កំហុស​ដោយ​អ​សុទ្ធចិត្ត​ក្នុងពេល​កន្លងមក ពី​សំណាក់​ជន​មួយចំនួន​ដែល​តែង​គិតថា លោក សម សារី ជា​ជន​ក្បត់ជាតិ ចូល​ដៃ​ចូល​ជើង​ជាមួយ​ចក្រពត្តិ​អាមេរិក​។ មកដល់​ម៉ោង​នេះ លោក​ប្រធាន សម រង្ស៊ី នៅតែ​បន្ត​បេសកកម្ម​ការងារ​ពី​ឪពុក ក្នុងការ​បម្រើ​ជាតិ​មាតុភូមិ ដោយ​ដង្ហែ​តាម​ព្រះរាជតម្រិះ​របស់​សម្តេច​ព្រះ​នរោត្តម សីហនុ និង​ព្រះរាជ​គំរូ​វីរភាព​ដ៏​ល្អ​ប្រពៃ ក្នុង​ការកសាង សង្គម​ខ្មែរ​មួយ​ឲ្យ​មាន​ភាព​ស្អាតស្អំ គ្មាន​អំពើ​ជិះជាន់​សង្កត់សង្កិន មាន​យុត្តិធម៌​សង្គម ដែល​ប្រជារាស្ត្រ​ខ្មែរ​គ្រប់រូប​រស់ក្នុង​ភាព​ក្សេមក្សាន្ត​សម្បូរ សប្បាយ​និង​មាន​ជីវភាព​ធូរធារ​ក្នុង​មហា​គ្រួសារ​ខ្មែរ​ដែលមាន​ការយោគយល់​អធ្យាស្រ័យ​គ្នា ដើម្បី​ពង្រឹង​ឯក ភាព​ផ្ទៃក្នុង​ជាតិខ្មែរ​។​
​          អ្នក​កត់ត្រា​ប្រវត្តិសាស្ត្រ​មួយចំនួន​បាន​រំលឹកថា លោក សម សារី កើត​នៅ​ថ្ងៃទី​៦ ខែមីនា ឆ្នាំ​១៩១៧ នៅ​ឃុំ​ជង្រុក ខេត្តកំពង់ស្ពឺ មាន​ឪពុក​ឈ្មោះ សម ញាន ធ្លាប់​បម្រើ​ការងារ​ជា​មន្ត្រី​រាជវាំង និង​ជា​រដ្ឋមន្ត្រីក្រសួង​ធម្មការ ក្នុង​ទសវត្សរ៍​ឆ្នាំ​១៩៤០ ហើយ លោក សម សារី គឺជា​កូន​ទី​២ ក្នុង​ចំ ណោម​កូន​ទាំងអស់​៧​នាក់​។ ពេល​រៀន​ចប់​បឋមសិក្សា​លោក សម សារី បានមក​សិក្សា​នៅ​អនុវិទ្យាល័យ ស៊ីសុវត្ថិ ក្នុង​ឆ្នាំ ១៩៣៥-១៩៣៦ ដែល​មិត្ត​ភក​ត្តិ​របស់គាត់​រួមមាន លោក អៀង សារី និង​លោក រ័ត្ន សាមឿន ជា​ខ្មែរ​កុ​ម្មុយ​និ​ស្ត​ដំបូង ហើយ​នៅ​ឆ្នាំ​១៩៣៩ លោក សម សារី បាន​ប្រឡង​ជាប់​មធ្យមសិក្សា​ប​ត្រ ផ្នែក​ទស្សនវិជ្ជា​។ ក្រោយមក​លោក សម សារី បាន​រៀប​អាពាហ៍ពិពាហ៍ ជាមួយ អ្នកស្រី អិ​ុ​ន អេ​ម ជា​ស្ត្រី​ខ្មែរ​ទី​១ ដែល ទទួលបាន​សញ្ញាបត្រ មធ្យមសិក្សា​ប​ត្រ​នៅ​ឥណ្ឌូចិន​បារាំង​សេស នា​ក្រុង ព្រៃនគរ កាលពី​ថ្ងៃទី​២៣ ខែធ្នូ ឆ្នាំ​១៩៣៩ ហើយ​ក្រោយមក មានកូន​ចំនួន​៥​នាក់ គឺ​ប្រុស​៤​នាក់ និង​ស្រី​ម្នាក់​រួមមាន អេ​ម្ម៉ា​រ៉ា កើត​នៅ​ឆ្នាំ ១៩៤០, អេ​ម្ម៉ា​រ៉ា​ន កើត​នៅ​ឆ្នាំ ១៩៤១,​អេ​ម្ម៉ា​ប្ញ​ទ្ធិ កើត​នៅ​ឆ្នាំ​១៩៤៥, មិ​ទ្ធា រី កើត​នៅ​ឆ្នាំ​១៩៤៦, និង​លោក​ប្រធាន សម រង្ស៊ី កើត​នៅ​ឆ្នាំ​១៩៤៩​។​
​          ក្នុង​អាយុ​២២​ឆ្នាំ គឺ​អំឡុង​ឆ្នាំ​១៩៣៩ លោក សម សារី បាន​ចូល​ក្នុងចំណោម​ខ្មែរ​ទី​១ ដែល​បានទទួល អាហារូបករណ៍​បារាំង ត្រូវ​មក​សិក្សា​នៅ​ស្រុក​បារាំង តែ​ត្រូវ​រង់ចាំ​ដល់​ឆ្នាំ​១៩៤៦ ទើបបាន​ទៅ​បន្ត​ការសិក្សា​ដែល​នៅ​ចន្លោះ​រយៈពេល​នោះ លោក សម សារី បាន​ចូល​បម្រើ​ការងារ​ក្នុង​ខេត្តបាត់ដំបង ជា​មន្ត្រី​តុលាការ​ជា​សុភា​ចា​រ្យ​បុរស កម្មសិក្សាការី​នៅ​ឆ្នាំ ១៩៤០ រហូតដល់​ឆ្នាំ​១៩៤៤ លោក សម សារី បាន​ផ្លាស់​មក​សាលាឧទ្ធរណ៍​ក្រុងភ្នំពេញ​។ នៅ​ឆ្នាំ ១៩៤៥ ពេល​ជប៉ុន ចូលកាន់​កាប់​ស្រុក​ខ្មែរ លោក សម សារី បាន​ធ្វើជា​មេ​នគរបាល​នយោបាយរ​ហូត​ដល់​ថ្ងៃទី​៤ ខែមករា ឆ្នាំ​១៩៤៦ បារាំង​និង​កម្ពុជា​បាន​ចុះហត្ថលេខា​លើ​កិច្ចព្រមព្រៀង​ស្រុះស្រួល​គ្នា​បណ្តោះអាសន្ន ដោយ​លោក​សម សារី បាន​ឡើង​ធ្វើជា​ស្នង ការ​ប៉ូលិស​នៅ​ភ្នំពេញ ។​ប៉ុន្តែ​នៅ​ឆ្នាំ ១៩៤៦ លោក សម សារី បានដាក់​ពាក្យសុំ​ឈប់​មួយរយៈ ដើម្បី​ទៅ​រៀន​យក​ឯកទេស​ហិរញ្ញវត្ថុ​នៅ​ស្រុក​បារាំង ដែល​នៅ​ទីនោះ​លោក សម  សារី មាន​ចំណូលចិត្ត​ទាក់ទង​បារាំង​ជា​អភិជន​ដើម្បី​ស្គាល់​ទំនៀមទម្លាប់​ប្រពៃណី​រហូតដល់​ថ្ងៃទី​៨ ខែកក្កដា ឆ្នាំ​១៩៤៩ លោក សម សារី បានទទួល​សញ្ញាបត្រ​ផ្នែក​សេវា​សា​ធា រណៈ នៅ​វិទ្យាស្ថាន​នយោបាយ​ក្រុងប៉ារីស​និង​បរិញ្ញាបត្រ​ច្បាប់ នៃ​មហាវិទ្យាល័យ​ច្បាប់​ក្រុងប៉ារីស ដែល​ក្រោយមក​លោក សម សារី បាន​ធ្វើជា​កម្មសិក្សាការី នៅ​ធនាគារជាតិ​នៃ​ប្រទេស​បារាំង​។​
​          ក្រោយមកទៀត លោក សម​សារី បាន​វិល​ត្រឡប់មក​ចូល​ប្រទេស​កម្ពុជា​វិញ នៅ​ឆ្នាំ​១៩៥០ ដោយ​ត្រូវបាន​លោក ប៉ែន នុត ណែនាំ​បង្ហាញ​សម្តេចព្រះ​នរោត្តម សីហនុ​ដែល​ពេលនោះ​ព្រះអង្គ​កំពុង​ស្វែងរក ”​អ្នក​ស្នេហា​មាតុភូមិ​ម្នាក់​មានចំណេះ​វិជ្ជា ធ្វើការ​ងារ​មាន​ប្រសិទ្ធភាព និង​ជា​អ្នក ខ្នះខ្នែង​ក្នុង​ការងារ ដើម្បី​ជួយ​ព្រះ អង្គ​ក្នុង​រាជ​បូជនីយកិច្ច​ទាមទារ ឯក រាជ្យ​”​។ លោក សម សារី គឺជា​បញ្ញវន្ត ម្នាក់​ដែល​អាចធ្វើ​ការងារ​អស់ទាំង​នេះ​បាន គឺ​លោក សម សារី មិន​ត្រឹមតែ​ជួយ​ព្រះរាជ​បូជនីយកិច្ច​នេះ​ទេ​គឺ លោក​បាន​សរសេរ​រឿងរ៉ាវ​កម្ពុជា​ក្រោម តវ៉ា​ទៅ​អាណានិគម​បារាំង ដែល​បាន​បញ្ចូល​ទឹកដី​កម្ពុជា​ក្រោម ឲ្យ​ស្ថិតក្រោម​រដ្ឋការ​របស់​រដ្ឋ​សមាគម​យួន នៅ​ថ្ងៃទី​៤ មិថុនា ឆ្នាំ​១៩៤៩ ដោយ​លោក សម សារី ចាត់ទុកថា​ជា​រឿង​អយុត្តិធម៌ ត្រូវ​តវ៉ា​ចរចា​យក​កម្ពុជា​ក្រោម​វិញ នៅពេល​ខាងមុខ​។
​          លោក សម សារី គឺជា​អ្នក​ប្រ កាន់​គោលជំហរ​ដើម្បី​ឯករាជ្យ​របស់​កម្ពុជា​ពិតប្រាកដ ពោលគឺ​ពីថ្ងៃ​ទី​២៩ ខែកក្កដា ឆ្នាំ​១៩៥៣ ដល់​ថ្ងៃទី​២២ ខែវិច្ឆិកា ឆ្នាំ​១៩៥៣ លោក សម សារី បាន​ធ្វើជា​រដ្ឋមន្ត្រីក្រសួង​អប់រំ និង​សន្និសីទ​រដ្ឋាភិបាល​នៃ​សង្គមរាស្ត្រនិយម ដែល​រយៈ​ពេលនេះ បា រាំង​កំពុងតែ​ផ្ទេរ​បន្តិច​ម្តងៗ​នូវ​សមត្ថ កិច្ច​រដ្ឋបាល​ឥណ្ឌូចិន​មក​ឲ្យ​កម្ពុជា ដោយ​ចង់​រក្សាទុក​កម្ពុជា​ក្នុង​សហភាព​បារាំង​។ លោក សម សារី ពេលនោះ​ជា​លេខាធិការ​នៃ​គណៈកម្មការ​ទទួល​ភារកិច្ច​ទទួល​រៀបចំ​ឯករាជ្យ មានបំណង​ឲ្យ​មាន​ស្វយ័តភាព​ភ្លាមៗ រហូតដល់​បារាំង​យល់ព្រម​ប្រគល់ ឯករាជ្យ​មក​ឲ្យ​កម្ពុជា​ទាំងស្រុង ហើយ បានប្រកាស​ជា​ផ្លូវការ​នៅ​ថ្ងៃទី​៩ ខែវិច្ឆិកា ឆ្នាំ​១៩៥៣​។ រហូតដល់​ឆ្នាំ​១៩៥៤ លោក សម សារី ត្រូវបាន​សម្តេចព្រះ​នរោត្តម សីហនុ តែងតាំង​ជា​ព្រះរាជតំណាង​ពិសេស​នៅក្នុង​គណៈប្រតិភូ​ខ្មែរ​ចូលរួម​សន្និសីទ ហ្សឺ​ណែវ ដើម្បី​បញ្ចប់សង្គ្រាម​ឥណ្ឌូចិន ដែល​ពេលនោះ​លោក សម សារី បាន​បញ្ចេញ​គុណសម្បត្តិ ជា​អ្នកចរចា​ដ៏​បុ​ិ​ន​ប្រសប់​ដើម្បី​រក្សា​បូរណភាព​ទឹកដី​ខ្មែរ គ្មាន​ការបែងចែក​សូម្បីតែ​មួយផ្នែក​ណាមួយ ទៅ​ឲ្យ​ពួក​កុ​ម្មុយ​និ​ស្ត សឺ​ង ង៉ុ​ក​មិញ​។​
​          បើ​ពិនិត្យ​លើ​កិត្តិយស កិត្តិគុណ បម្រើ​រាជបល្ល័ង្ក​របស់លោក សម សារី គឺ​អ្នក​កត់ត្រា​ផ្នែក​ប្រវត្តិសាស្ត្រ​បាន​លើកឡើងថា លោក សម សារី បាន​វិល​ត្រឡប់មក​ភ្នំពេញ​នៅ​ឆ្នាំ​១៩៥៥ នាំមក​នូវ​ជ័យជំនះ​ធំធេង​នៃ​ការចរចា​មក​ថ្វាយ​សម្តេចព្រះ​នរោត្តម សីហនុ រហូតដល់​ថ្ងៃទី​២ ខែមីនា ឆ្នាំ​១៩៥៥ លោក សម សារី លោក ប៉ែន នុត និង​លោក ឃឹម ទិ​ត ត្រូវបានតែងតាំង​ជា​ឧ​ត្ត​ម​ក្រុមប្រឹក្សារាជបល្ល័ង្ក ហើយ​លោក សម សារី ក៏ត្រូវ​បាន​បន្ថែម​តួនាទី​មួយទៀត ជា​អ្នកនិពន្ធ​ជីវប្រវត្តិ​ថ្វាយ​សម្តេចព្រះ​នរោត្តម សីហនុ​។ ដល់​ថ្ងៃទី​២ មីនា ឆ្នាំ ១៩៥៥ សម្តេចព្រះ​នរោត្តម សីហនុ បានដាក់​រាជ្យ​ថ្វាយ​ព្រះបិតា ហើយ​ទៅ​បង្កើត​ចលនា​សង្គមរាស្ត្រនិយម​ដែល​នៅពេលនោះ ព្រះអង្គ​បានសម្រេច​ជ្រើសរើស​លោក សម សារី ជា​សហការី​ដ៏​ជំនិត​ម្នាក់ គឺ​ក្នុង​រដ្ឋាភិបាល​ទី​១ នៃ​របប​សង្គមរាស្ត្រនិយម​ដែលមាន​សម្តេចព្រះ​នរោត្តម សីហនុ ជា​នាយករដ្ឋមន្ត្រី និង​មាន​លោក សម សារី ជា​ឧបនាយករដ្ឋមន្ត្រី ទទួលបន្ទុក​ជា​រដ្ឋមន្ត្រី​កិច្ចការ​សេដ្ឋកិច្ច ហិរញ្ញវត្ថុ ផែនការ និង​អប់រំ​ជាតិ​។ បើ​ពិនិត្យមើល​ពី​សកម្មភាព​ការងារ​របស់លោក សម សារី បានបង្ហាញ​យ៉ាងច្បាស់​អំពី​គោលជំហរ​ការពារ​ព្រះរាជ​បល្ល័ង្ក ដង្ហែ​តាម​ព្រះរាជតម្រិះ​របស់​សម្តេច​ព្រះ​នរោត្តម សីហនុ និង​បាន​នាំមក​នូវ​ជោគជ័យ​ដ៏​ធំធេង​ជូន​ជាតិ​មាតុភូមិ និង​រាស្ត្រ​ខ្មែរ​ទូទៅ ហើយ​លោក​ប្រធាន សម រង្ស៊ី បាន​បន្ត​បេសកកម្ម​ពី​ឪពុក​ក្នុងការ​បម្រើ​ជាតិ​មាតុភូមិ ដោយស្មោះ​ស្ម័គ្រ សមជា​ឈាមជ័រ​អ្នកស្នេហាជាតិ​ប្រកបដោយ​ឧ​ត្ត​ម​គតិ​ដ៏​មានតម្លៃ​និង​គួរ​ឲ្យ​គោរព​ជាទីបំផុត​៕


ไม่มีความคิดเห็น:

แสดงความคิดเห็น